La fantasie de l Natal



L sprito festibo de la temporada de Natal nun puode muorrir-se por bias seia de l que fur.

Ten que haber siempre algue andrentro de cada un de nós, fuorças, motibaçones para pormober i eilebar esta quadra natalícia, nun solo pa ls ninos i ninas, ls mais pequeinhos, que míran i acradítan que ye neste tiempo que l nino Jasus pon ne l çapatico ou l pai-natal trai ne l saco las mais deseadas cousas queilhes mais quieren, mas tamien ls mais crecidos ténen que arranjar fuorças para nun se deixar bencir pulas remordidelas de la bida que mos metiu ne ls redadeiros tiempos.

Nun ye squecir-los, poner-los para atrás de las cuostas, naide resolbe nada squecindo seia l que fur muito menos aqueilho que ten que ser resolbido para nuosso bien de ls nuossos i de todos, até que hai bida para alhá de l Natal, mas mesmo que isto seia cumbersa feita, esta temporada festiba debe ser aporbeitada para fortalecer l’ounion de la família, tantas bezes doliente por bias de nun haber muita pacéncia para atamar las canseiras de l die a die, que mos chégan pul anfernizamiento i males dun goberno ou de la ganáncia que mos arrodeia, la falta de stima que ténen por nós.

L sprito natalício, ne l que toca als mais nuobos (aqueilhes qu’inda acradítan) dá uas buonas upas na sue formaçon psicológica i mental, dízen-lo ls specialistas, i you i la maiorie acradita i antende, que esta ambolbéncia amistosa de la fiesta de la comemoraçon de nacimiento de l Nino Jasus yé carinosa l bastante para anchir ls pequeinhos de felcidade. Assi sendo serie mui malo nun fazer i armar todo l que cuidarmos ser amportante an nuossas casas, eigreijas ou spácios públicos cun aluson l fato.

I para que esse sprito de pureza, bundade, simplecidade, hounestidade, de melhores modos chegue ls ninos i ninas, l mais de las bezes até nien ye perciso tener muito, i bibir atolhado de bienes, todo se puode fazer a la medida de l que podemos, puis to ls sabemos que l crecimiento i zambolbimiento deste tesouros se fai to ls dies, cul acunchego i l sustento que le damos siempre.

I quanto mais rial fur l Natal mais fácele será splicar todo, seia el d’abundáncia seia el mais ancolhido.

Nun me lhembro de l que recebie ne ls natales quando era garoto, hai sessenta anhos datrás éran na berdade outros tiempos, mas tamien nun tengo lhembránçias malas, sei que se botaba mais fé nas manifestaçones religiosas, l serano até la missa de l galho que era a meia-nuite, l beijar de l nino, la sagrada família, i sei que nesses dies habie muita fartura de quemer, la mesa staba siempre chena de cousas buonas i gustosas, ambora la bida que bibien ls mius nun fusse nanhun cielo na tierra, fui un nino feliç.

Para fazer la felcidade de ls ninos i de ls outros até nien ye perciso muito.

Buonas fiesta para todos, bamos fazer deste Natal un repiquete para las nuossas bidas.

1 comentários:

José Ventura disse...

Fantasias de Natal "Armano" Faustino, fico cuntente por teneres scrito ne l Blog de Caçarelhos este testo bien guapo, subre la quadra Natalícia que se aprossima. Fico cheno de proua por seres l purmeiro i creio que pula terceira beç que screbes neste miu Blog cousas guapas que solo tu sabes screbir. Mesmo nun sendo de Caçarelhos, até poderás serbir para puxar puls Caçarelhenses que son mui ambergonhados, gustan de lher, mas nun saben screbir a todas las minhas mensaiges. Miu "armano" Un abraço i un Santo Natal i un bun Anho de de 2012 para ti, Natália, Suzana i miu sobrino AFONSO. José Bintura.

Enviar um comentário